Mama nam je govorila: “deca, od Pepelnice do Vuzma puno je postov. Ne šika se ni popievati, ni vikati. Ni vrieme  za  zôbavu  ni svôdbu.”
Saki petek se išlo navečer v cirkvu  na Križni put i puno se molilo.

Kad je došel dôn gda su Isuseka deli v grob, mi deca smu brali  ljubičice i delali  môle  buketiće tere smu metali v čašice. Ciela je hiža dišala po ljubičicami. Zavlôčili smu se pod grmje vuz cestu da je naberemu, pôk smu znali biti si spikani od trnine v grmju. Mama je rekla da Isusek  se to vidi.

Vuzem je bil zapovedani svetek negda i denes. Na Veliki četrtek o poldan bi se zvona povezala da ne zvoniju do Vuzma. Negda je zvonôr teri je zvonil tak moral narediti, a denes je  se  ionak na struju – pôk ni treba nikaj vezati. Od toga dôna se v zemlu ne dira, ne kopa  se i ne orje  zemlica, se do posle Vuzmenoga pondelka.

Na Vuzem rano vjutro su sneje ze sake hiže išle z košarami v cirkvu na blagoslov. Košara se dela na glavu, ali ni bila lefka za nositi. Vujne su bila jôjca, pofarbane pisanice tere su se daruvale čestitorom, kruv, sol, šunka, mlôdi luk i gibanica…več dô je kak imal. Košare su bile pokrite z liepemi stolnicami, da je bilo milina za  gledeti.

Čem bi velečasni obavil blagoslov jela, sneje bi brže potekle vôn z cirkve. Drčale su domom, samo kak bi prve stigle. Ona tera  prva stigne domom, bu imala sreče to leto. Pri  te  hiže de je sneja prva došla, gazda je moral ponuditi susede z rakijum. Em mu je sneja sreču v hižu donesla..

Si bi se pri hiže okupili oko stola i jeli blagoslovleno  jelo. Oblekli bi se v najlepše  kaj su imali, a onda bi išli v cirkvu k meše. Sečam se da sem dobila za jen  Vuzem  novu kiklicu i novu obuću, bila sem tak vesela. V cirkve sem dôla pušicu Isuseku na saku njegvu ranu  i dela dinarek v košaricu vuz njega. A  zvona su  zvonila i zvonila.

Baka bi navek ostala doma kuvati obed za se nas, se nas je čekalo gotovo kad bi  se vrnuli  domom. Mi bi posle  meše z pisanicami  išli čestitat susedom i familije.

Sreten vam Vuzem, drôgi čitateli!